Италијанскиот град Пиаченца е во потрес од смртта на двегодишното дете, кое било заборавено од својот татко во семејниот автомобил и останало таму цели 8 часа, додека го откријат, објавија локалните медиуми...

Родителите на детето добиле нервозен шок и се примени во болница. Според првите информации од истрагата температурата во внатрешноста на автомобилот достигнала 60 степени, пишува весникот "Кориере дела сера", а кога детето било најдено температурата на телото му била околу 40 степени.

Обдукцијата ќе ги покаже причините за неговата смрт, но експертите мислат дека тоа починало од задушување уште на четвртиот час, откако останало само во колата. Поради состојбата на родителите, тие се уште не можат да сведочат пред истражителите.

Таткото, 39-годишниот Андреа Албанезе, може да биде осуден за убиство без предумисла. Тој тргнал да го остави синот во јасли, но од непознати причини излегол од автомобилот, го оставил детето таму и го заборавил. Дедото тргнал да го земе од јаслите, но откако разбрал дека го нема, телефонирал на мајката, а таа - на таткото. Родителот веднаш истрчал кон автомобилот, но веќе било многу, многу доцна.