Неименуваниот човек е директен сведок за вчерашното брутално убиство на британскиот војник во Лондон...



Убиецот му пријдел на сведокот и му рекол: „Твојот народ никогаш нема да биде безбеден.“

Сведокот што го снимил ова шокантно видео одел на интервју за работа, кога одеднаш станал сведок на шокантен чин. На видеото што го снимил со неговиот мобилен телефон, се гледаат крвавите раце и оружјето во рацете на убиецот на британскиот војник.

Сведокот вели дека убиецот му пријдел и рекол дека сака да разговара со него, пренесува Ројтерс. „Се колнеме во семоќниот Алах дека никогаш нема да престанеме да се бориме со вас. Се додека не не оставите на мир, вашите луѓе нема да бидат сигурни. Го направивме ова затоа што британски војници убиваат муслимани секој ден. Смртта на овој британски војник е око за око, заб за заб. Им се извинувам на жените што сведочеа за ова, но во нашата земја жените ги гледаат истите овие работи. Ослободете се од оваа влада, тие не се грижат за вас“, рече човекот со крвави раце пред камерата.

„Сето тоа беше многу тажно. Да гледаш како некој умира тукутака... Беше многу чуден ден“, рече сведокот, кој тврди дека убиецот не се ни обидел да побегне, туку мирно ја чекал полицијата. Потоа следела вооружена пресметка во која напаѓачите на војникот се повредени и пренесени во болница, а еден од нив бил во критична состојба.

Со напаѓачот се соочила и Ингрид Лоја-Кенет, кој излегла одавтобусот за да провери дали дише нападнатиот војник. Сведоците велат дека еден од напаѓачите и рекол „сакаат да започнат војна во Лондон вечерва“, а таа одговорила "моментално само вие двајца сте против многу луѓе, ќе изгубите, што сакате да направите?“.

Други сведоци кажуваат дека храбрата жена дури и застанала над телото на војникот и ги спречувала напаѓачите да му пријдат, пишува Daily Mail.

Инаку, ова е првиот исламистички напад во Лондон по самоубиствениот бомбашки напад врз лондонскиот јавен превоз во јули 2005 година.