Верона, градот на Ромео и Јулија, се надева дека ќе извлече корист од популарноста на ликовите на Шекспир и ќе зема по две евра од секој кој сака да го види прочуениот балкон...

Туристите кои сакаат да влезат во дворот, за да го видат балконот од кој Јулија била заведувана од Ромео, наскоро ќе мора да плаќаат такса врз основа на плановите од Градскиот совет на Верона.

Балконот се издига од куќата на Јулија, зграда од 14 век, во која некогаш живеело семејството Капело, најверојатниот прототип на Капулети од драмата на Шекспир. Советот размислува исто така за идејата за создавање на луксузна соба на горниот кат на куќата на Јулија, каде паровите ќе можат да поминат првата ноќ од нивниот меден месец. Таа може да чини и до 5.000 евра, соопштуваат локалните медиуми.

"Се надеваме дека ќе спроведеме разговори со сопствениците на зградите кои гледаат кон дворот, па да се најде соодветно решение за сите", изјави Енрико Корсо, општински советник задолжен за туризам. "Ова треба да биде во интерес на целиот град, кој е познат во целиот свет преку легендата за Јулија", додаде тој.
Градот се обидува да се утврди како романтично место и веќе создаде проект, наречен "омажи се за мене во Верона", рекламиран како "искуство само еднаш во животот, следејќи ги чекорите на Ромео и Јулија". Тоа им овозможува на Италијанци и странци да се женат на различни сценски места, вклучувајќи во куќата на Јулија.

Балконот привлекува бројни туристи во Верона, но историчарите велат дека има малку докази кои го поврзуваат него со трагичната љубовна приказна на Шекспир. Иако семејствата Капулети и Монтеки навистина постоеле, нема информации за непријателство меѓу нив, а Ромео и Јулија се целосно измислени ликови.