Патниците во метрото во Прага, кои не ја нашле љубовта, наскоро ќе можат да си ја испробаат среќата во специјални вагони за љубовни состаноци, соопшти портпаролот на транспортната компанија...
"Луѓето ќе се среќаваат таму, ќе одат еден покрај друг и ако си се допаднат меѓусебно можат да почнат врска", изјави портпаролот на компанијата Ропид, која е одговорна за проектот. Специјалните вагони се дел од напорите за промоција на јавниот превоз.
"Планираме кампања чија цел е да им се покажат на луѓето работите кои можат да ги прават во јавниот превоз", изјави Драпал. Така меѓу читањето или учењето, патниците кои си досадуваат наскоро ќе можат да флертуваат и да средат љубовна средба. "Возот на љубовта" во Прага, кој ќе овозможува индивидуален пристап наместо да се потпира на строгите правила на брзите состаноци, ќе биде лансирана кон крајот на годината.
Драпал изјави дека сега компанијата треба да одлучи кои од петте вагони на возовите би биле најпогодни бројот на возовите кои ќе бидат вклучени, и какви ознаки да бидат поставени. "Планираме анкетирање на патниците. Вагонот ќе биде одбележан и ќе има информации на перонот и во самиот вагон, вклучувајќи и странски јазици", изјави портпаролот.
Патниците ги користат трите линии на метрото во Прага околу 1,5 милиони пати на ден. Во чешката престолнина живеат околу 1,25 милиони луѓе. Драпал соопшти дека никој нема да биде принуден да флертува во специјалните вагони, но некои патници сепак имаат грижи. "Кога брзам влегувам во првата отворена врата, која ја гледам. Сега треба да внимавам бидејќи некој може да почне да ме заведува", вели Петар Ворачек. "Како истакнат корисник на метрото, се плашам дека ќе се претвори во центар на озборувањето. Што ќе се случи ако некој ме види и каже на мојот партнер?", се загрижува Каролина Вранова.
