Горниот дом на британскиот парламент, Домот на лордовите, денеска ги усвои измените на законот за наследување на престолот.

Овие измени на законот за 300 години старата процедура на наследување на тронот, според која машко дете од кралското семејство било директен наследник, сега треба да го одобри Елизабета II.

Доколку и кралицата ги потврди измените, детето на принцот Вилијам и неговата сопруга Кејт, кое треба да се роди во јули, би можело да го наследи тронот без разлика на полот.

До сега женското дете можеше да постане монарх само ако нема брат, што е токму случајот со кралицата Елизабета II.

Според усвоените измени на законот, наследникот на тронот би можел да се ожени или да се мажи за католик, но католиците нема да можат да ја наследат круната.

Детето на принцот Вилијам и Кејт би било трето во редот за наследник на престолот, по Вилијам и неговиот татко, синот на кралицата, принцот Чарлс.