Претседателот на Кипар, Никос Анастасиједес вчера изјави дека таа земја ќе отвори коцкарници и ќе го засили туризмот за повторно да ја засили економијата.

Анастасиједес ја објави првата низа мерки за поттикнување на економскиот раст кој, според предвидувањата, до 2015 година ќе се намали за 13%.

Тој рече дека Кипар на компаниите ќе им дава даночни олеснувања ако вработуваат нови работници и воведат паркови со соларна енергија. На младите ќе им биде дадена државна и црквена земја за обработување, а оние на кои им се запленети куќите или фармите затоа што не можеле да ги отплатат кредитите ќе можат и понатаму да го користат запленетиот имот како закупци.

Кипар минатиот месец прифати кредит од 23 милијарди евра од своите партнери во еврозоната и Меѓународниот монетарен фонд.