Францускиот претседател Франсоа Оланд ги дефинира како хомофобични активностите на противниците на законот за бракови меѓу истополови партнери, откако протестите се претворија во насилство...

Правото на протест е признато од нашиот устав и е прифатено од страна на Французите, но протестите не смеат да се дегенерира во претерувања, истакнал Оланд. Од своја страна министерот за внатрешни работи Мануел Валс ги повика противниците на законот да ги изолираат од своите редови претставниците на екстремно десничарските организации, кои стојат зад насилството.

Според текстот, кој е во долниот дом на парламентот за одобрување на второ читање, на истополовите брачни парови ќе им биде дозволено да посвојуваат деца.

Протестите против предлог законот се засилуваат, така што во неделата се очекува да биде нивната кулминација. При вчерашните немири настрадаа и новинари од телевизискиот канал на парламентот, кои биле малтретирани, а нивната опрема - искршена. Жан-Франсоа Коп од десничарската опозициска партија Сојуз за народно движење ги осуди хомофобични активности, но додаде дека Оланд во одреден степен е виновен за длабоката поделеност во однос на законот, бидејќи ја игнорирал загриженоста на Французите од новиот текст.

При вчерашните протести против хомосексуалните бракови биле уапсени околу 70 лица.