Нов Зеланд стана 13 држава на светот и прва во азијско-пацифичкиот регион која ги легализираше истополовите бракови.

Пратениците го усвоија законот за геј бракови со 77 гласови ЗА и 44 гласови ПРОТИВ.

Лидерите на повеќето политички партии ги охрабруваа своите пратеници да гласаат според својата свест, а не во склад со партиските ставови.

Луѓето кои набљудувале од галеријата во општинската сала и некои пратеници веднаш по објавувањето на резултатот со песна го прославија усвојувањето на законот. Пред парламентот се собрале и повеќе стотина активисти за заштита на човечките права.

Нов Зеланд од 2005 година ги одобрува граѓанските заедници, кои на геј паровите им даваат многу законски права.

Со новиот закон, кој ќе стапи во сила во август, венчаните хомосексуалци ќе можат да посвојуваат деца.

Истополовите бракови се легализирани во Холандија, Белгија, Шпанија, Канада, Јужна Африка, Норвешка, Шведска, Португалија, Исланд, Аргентина и Данска.

Пратениците на Уругвај го усвоија законот минатата седмица и се очекува дека претседателот ќе го потпише. Девет американски сојузни држави исто така ги признаваат геј браковите.