Златното јајце опточено со дијаманти, кое е украдено пред четири години во Женева и чија вредност е проценета на милион евра, го пронашла француската полиција недалеку од швајцарската граница.

Полицијата соопштила дека драгоценото јајце, кое е направено во познатиот фаберже стил, откриено е вчера за време на рутинска сообраќајна контрола кога сомничав BMW автомобил е запрен и во кој се наоѓале двајца Белоруски државјани, кои се уапсени.

Во соопштението се истакнува дека уапсен е и трет Белорус, кој има прибежиште во Швајцарија и кој го следел BMW-то во јагуар.

Неименуван претставник на француската полиција кажал дека за време на испитувањето тројцата уапсени тврделе дека драгоцениот предмет го нашле на земјата и дека ли дека евтино го купиле на некој пазар.

Уапсените се обвинети за поседување на украдена роба и вооружување. За уапсените постојат потерници во Франција и Швајцарија поради неколку провали.