Три милиони автомобили на јапонските произведувачи „Тојота“, „Нисан“, „Хонда“ и „Мазда“ ќе бидат повлечени во светот поради проблем со системот на воздушни перничиња, соопшти Министерството за сообраќај на Јапонија.

Постои опасност воздушните перничиња во возилата склопени меѓу 2000 и 2004 година да не се активираат како што е предвидено, се наведува во соопштението.

Системите за воздушни перничиња на автомобилските фабрики им ги испорачува еден јапонски произведувач.

Министерството соопшти дека такви возила во светот има 2,92 милиони, додека, според податоците на произведувачите, има 3,3 милиони.

„Тојота“ за поправка ќе ги повика сопствениците на 1,73 милиони возила: 320.000 во Јапонија, 580.000 во Северна Америка, 490.000 во Европа и 340.000 во остатокот од светот, кажано е од таа компанија во Токио.

„Хонда“ ќе повлече 1,135 милиони возила во Азија, Африка и Америка, „Нисан“ - 480.000 возила, а „Мазда“ - 45.000 возила.