Пејачот откри дека штотуку го завршил двомесечниот престој на клиника за рехабилитација.

Џорџ Мајкл (49) доброволно заминал во клиниката „Засолниште“ во Бајрон Беј, Австралија, за да се избори со „емотивните потешкотии, анксиозноста“ и други проблеми. Не станува збор за болести на зависност, нагласи тој.

„Отидов по помош која ми беше повеќе од потребна. Лекарите долго ми зборуваа дека морам на пост-трауматски советувања, но јас погрешно мислев дека мојата музика, уметност и настапување ќе бидат вистинскиот лек“, соопшти Мајкл.

Тој во февруари се пријавил на лечење во установа во која недела дена престој чини 27.000 фунти, и таму поминал околу два месеци.

Британскиот печат пишува дека ја завршил предвидената терапија и дека наскоро се враќа дома.

Мајкл во 2011 за малку ќе го убиеше воспаление на белите дробови, по тоа настапи минатата година на затварањето на Олимпијадата во Лондон, но потоа ја откажа турнејата и исчезна од јавниот живот.