Во американската држава Вашингтон судијата на две момчиња, на возраст од 10 и 11 години, ги прогласил за способни на судот за малолетници да им се суди за заговор за убиство.

Обвинителот во округот Стивенс, Тим Расмусен, изјавил дека момчињата, ученици во петто одделение, имале со рака напишан план од седум точки за убиство на девојче со кое учеле.

Таа листа на чекори кон извршувањето на убиството е поднесена како доказ за нивните ментални способности.

Судијата навел дека момчињата ја разбирале природата и поседиците на своите постапки.

Тие се изјасниле дека не се криви по обвинението кое ги терети дека планирале убиство, подмитиле сведок и поседувале огнено оружје.

Момчињата се уапсени на 7 февруари, кога помлад ученик пријавил дека еден од нив има нож. Кога му го пребарале ранецот, нашле и полуавтоматски пиштол и муниција.

Одредена им е кауција од по 100.000 долари, а психијатарот за одбрана и државниот психолог оцениле дека момчињата претставуваат опасност за општеството.