Додека се чека Врховниот суд на Соединетите Американски Држави да донесе одлука за законитоста за забраната на хомосексуалните бракови, влијателното списание Time веќе прогласи победа, објавувајќи две геј насловни страници.

Станува збор за црно-бели фотографии на кои два хомосексуални парови се бакнуваат - две жени, кои се венчале пред две години, и двајца мажи кои неодамна се вериле.

„Врховниот суд се уште нема донесено одлука, но Америка одлучи“, гласи насловот.

Прашањето за геј правата во последните години стана актуелно политичко прашање, па така американскиот претседател Барак Обама за време на својот инаугурационен говор посебно внимание посвети на правата на LGBT заедницата, заложувајќи се за изедначување на нивните права со правата на останатите луѓе.

„Долго расправавме во редакцијата“, пишува во воведниот дел Рик Стенгел, главниот уредник на Time. „Некои сметаа дека фотографиите се премногу сензационалистички, премногу директни. На други пак, им се допаднаа затоа што се убави и претставуваат љубов која што е основа за бракот. Се согласувам со вторите, а се надевам дека и вие ќе мислите така.“