Бел чад вчера излезе од оџакот на Сикстинската капела во Ватикан, што значи дека 115-те кардинали избраа нов поглавар на Римокатоличката црква...

Камбаните на капелата биеја свечено минути откако стана јасно дека конклавот избрал нов папа. Илјадници луѓе собрани на плоштадот Свети Петар во Рим се радуваа, откако го видоа белиот чад од оџакот на Сикстинската капела. Првично чадот изгледаше сивкав, но постепено стана бел и тоа беше пречекано со еуфорија на плоштадот. Луѓето вееа знамиња и се радуваа.

Наследникот на Бенедикт XVI беше избран уште на вториот ден од Конклавот, кој започна вчера попладне.

Аргентинецот Хорхе Марио Берголио беше избран за папа вчера вечер и ќе го прифати името Франциско I, соопшти Ватикан.

Ова е прв папа од Америка. Берголио, кој беше архиепископ на Буенос Аирес стана првиот папа неевропеец од 1000 години. По изборот новоизбраниот папа се појави на балконот на базиликата Свети Петар, за да ги прифати овациите на големата толпа на плоштадот.

"Се чини дека кардиналите дојдоа да ме бараат на крајот на светот", изјави папата Франциско I во првите зборови од балконот на базиликата Свети Петар.