Чадот кој ќе се појави од оџакот, за да посведочи дали кардиналите, заклучени во Сикстинската капела, го избраа новиот папа, не се добива само од согорувањето на употребените гласачки ливчиња, соопшти Ватикан...

"Користиме сигнален чад", изјави Паоло Сагрети, кој е одговорен за подготовката на Капелата. Стариот систем на  сигнализација кој продолжува да биде единствениот начин публиката да дознае дали е избран папа, вклучува мешање на гласачките ливчиња со влажна слама за создавање на бел чад и со катран за создавање на црн чад.

По неколку случаи во кои сивкав чад, кој изгледаше како бел, така и црн, создаде конфузија, Ватикан воведе посигурем систем кој се користи за прв пат на последниот конклав во 2005 година.

Сега Витакан користи смеса од калиум перхлорат, антрацен и сулфур за создавање на црн чад и калиум перхлорат, лактоза и дрвна смола за создавање на бел чад. Во агол на Капелата се наоѓаат две фурни - едната за согорување на гласачките ливчиња, а другата - за хемикалиите, така што чадот од двете печки излегува од ист оџак.

Електронски контролен панел овозможува да се избере меѓу двете, така што вистинските состојки се согоруваат истовремено со употребените гласачки ливчиња.

Црн чад се издигна денес околу пладне над Сикстинската капела во Ватикан, што е знак дека кардиналите не избраа папа со двете гласања предвидени за првиот дел од денот.
 
Конклавот на 115-те кардинали избирачи продолжува попладне во услови на целосна тајност, додека биде избран новиот шеф на Римокатоличката црква на местото на Бенедикт XVI кој се повлече на 28 февруари.