Отпорноста на организмот на човекот кон дејството на антибиотици претставува глобална закана, споредлива со тероризмот и глобалното затоплување, изјави главната советничка на британската влада за прашањата за здравство...

Според Сали Дејвис проблемот е темпирана бомба. Таа истакна дека повеќето обични лесни операции можат да бидат смртоносни за 20 години, ако пациентите не се во состојба да се борат против инфекциите поради резистенција кон антибиотиците.

Професорот по медицина Сали Дејвис рече дека според неа оваа опасност треба да се додаде на листата на Владата со главните опасности кои и се закануваат на земјата, вклучувајќи ги тероризмот и глобалното затоплување. Таа и препорача на британската влада да го покрене ова прашање на следната средба на министрите за надворешни работи на Г-8, што ќе се одржи следниот месец во Велика Британија.

"Ако не дејствуваме сега, за 20 години секој од нас, кој ќе се најде во болница за мала хируршка интервенција, може да умре од обична инфекција поради резистенција кон антибиотици", истакна таа.

Според неа, владите и главните меѓународни организации, вклучувајќи ги и Светската здравствена организација, треба да го усвојат проблемот сериозно. Владата на Велика Британија наскоро ќе даде пример во овој поглед така што ќе го претстави својот стратешки план за решавање  на овој проблем за следните пет години.