Американската управа за транспорт (TSA) соопштила дека на патниците наскоро ќе им биде овозможено да внесуваат мали сечива во авионите, прв пат од терористичките напади на 11 септември 2001 година.

Од 25 април патниците ќе можат да внесат во авионот ножиња на расклопување од шест сантиметри и потесни од 1,3 сантиметри. Останатите сечила, бричеви и слично, и понатаму остануваат строго забранети.

Исто така, новите прописи ќе дозволат во рачниот багаж во авионот да се внесат и билјардски и скијачки стапови, како и палки за крикет и хокеј.

„Ова е дел од системот за безбедност кој ќе им овозможи на припадниците на безбедноста своите напори да ги усмерат кон пронаоѓање на предмети какви што се експлозивите“, рече портпаролот на TSA.

Меѓутоа, синдикатот на работниците на авионскиот екипаж соопшти дека овој потег е „лош и кратковид“.

„Сметаме дека овие промени можат да ги загрозат животите на персоналот на авионот и патниците“, се наведува во соопштението.