Британската кралица Елизабета II (86) вчера излезе од болница ден откако е примена со симптоми на гастроентеритис.

Кралицата при заминувањето се поздравила со персоналот на болницата Крал Едвард VII, кој се наоѓа во центарот на Лондон.

Претставниците на Бакингемската палата изјавиле дека симптомите на стомачното заболување кај кралицата се појавиле кон крајот на минатата седмица и дека во болница заминала од претпазливост.

Сите планирани случувања, во кои требаше да учествува кралицата во текот на оваа недела, се откажани поради нејзината здравствена состојба.

Аналитичарите наведуваат дека е невообичаено кралицата, која е многу одговорна во извршувањето на своите должности, да ги откаже сите активности.

Кралицата Елизабета II, која на престолот е веќе 60 години, позната е по доброто здравје. Последен пат во болница била во 2003 година поради операција на коленото.