Во Кина се уапсени четири личности поради сквернавење на гробови и ископување на тела за продавање на традиционални „свадби на духови“, во кои неоженетите мртви мажи се погребувани со жени за задгробниот живот.

Бракот е важна институција во кинеското општество и иако таа пракса е се поретка, се уште постојат семејства кои се придржуваат до старите обичаи и праваат „свадби на духови“ кога ќе им умре синот пред истиот да се ожени.

Обично тоа се договара меѓу семејствата на починатите, но еден весник пишува дека група „крадела женски тела и откако ги чистеле и правеле медицинска документација, ги продавале за големи износи“.

Судот во северната провинција Шанси осудил четири луѓе на затворска казна меѓу 28 и 32 месеци затвор, пишува весникот и наведува дека тие ги „искористувале лошите обичаи“ на свадбите на духови во делови на провинцијата Шанси и соседната провинција Шаанси.

Цитирајќи го претставникот на судот, весникот објавил дека четворката заработила вкупно 39.000 долари со продажба на десет тела.