По абдикацијата на поглаварот на Римокатоличката црква, Бенедикт XVI ќе ја задржи титулата „неговата светост“, а официјално ќе се нарече „почесен папа“, соопшти Ватикан.

Портпаролот на Светата столица Федерико Ломбарди рече дека Бенедикт XVI сам одлучил така, додавајќи дека по повлекувањето тој ќе носи едноставна бела мантија, а дека во склад со ватиканската традиција, папскиот прстен ќе биде уништен.

Ројтерс наведува дека Бенедикт XVI во четврток ќе стане првиот папа кој после шест векови ќе абдицира наместо да биде поглавар доживотно.

Кога папата на 28 февруари ќе се повлече, папскиот престол ќе биде испразнет, а управувањето на Ватикан колективно ќе го преземе Колегиумот кардинали.

Меѓу првите негови одлуки ќе биде одредувањето на датум за изборна конклава, со која ќе се избере следниот римски папа.

Не се исклучува можноста конклавата да биде закажана до 10 март, затоа што папата Бенедикт XVI издаде декрет со кој се овозможува поместување напред на датумот за одржување на конклавата на кардиналите за избор на нов поглавар на Римокатоличката црква, кој ќе го наследи.