Полицијата во Романија привела 30, а ги претресла домовите на шест личности вработени во една клиника за вештачко оплодување поради илегална трговија со човечки органи.

Според наводите на полицијата, вработените во неименувана клиника во Букурешт земале јајце-клетки од жени на возраст од 18 до 30 години, за што им плаќале меѓу 600 и 800 евра, а потоа ги продавале клетките на муштерии во Израел за три до четири илјади евра.

Според наводите на полицијата, во противзаконското тргување со јајце-клетки вмешани се 11 државјани на Романија и Израел, меѓу кои има и неколку доктори, медицински сестри и ембриолози.

Во полицијата соопштиле дека поголемиот дел од јајце-клетките завршиле кај израелски државјани кои доаѓале во Романија за вештачко оплодување.

Ваквата пракса на „соработка“ меѓу Романците и Израелците не е новост, затоа што сличен случај, и по содржина и по број на „актери“, како и по нивната националност, се одигра во Букурешт во 2009 година.