Бугарските лекари се борат за животите на шест младичи и девојки кои на една забава во селото Падеш, кај Благоевград конзумирале течност за миење на шофершајбни, мислејќи дека пијат домашна ракија.

Токсикологот во болницата „Пирогов“ во Софија, Мирослава Петкова изјавила дека нивната здравствена состојба е многу тешка и дека животите им се во опасност.

Групата млади испила три литри течност за шофершајбни, која ја мешале со сок од јагоди.

Забавата е одржана во понеделник, 11 февруари, но младите побарале помош дури вчера, откако „обичниот мамурлак“ прераснал во вртоглавица, несвестица и повраќање, а потоа во кома.

Лекарите наведуваат дека за нивните животи клучни ќе бидат наредните 48 часа, бидејќи во значителна мерка им се оштетени функциите на мозокот, бубрезите, црниот дроб и останатите витални органи.