Патоанатом во Нов Зеланд дојде до заклучок дека смртта на 30-годишната Наташа Харис била предизвикана од прекумерна употреба на Кока-Кола. Жената починала пред три години, откако нејзиното срце едноставно застанало, пренесе БиБиСи...

Лекарите утврдиле дека покојната жена на ден конзумирала најмалку 10 литри од газираниот пијалок. Во тоа количество се содржат два пати повеќе кофеин (970 мг.) од препорачаната дневна доза и 11 пати повеќе шеќер (над 1 кг.) отколку што е здраво да се зема дневно. Сите заби на Наташа, која била мајка на 8 деца, опадале непосредно пред смртта.

Компанијата, производител на пијалокот, го отфрла заклучокот на патоанатомите. Според неа, е невозможно да се докаже дека смртта на Наташа настапила како последица на злоупотреба на Кока Кола. Роднините на Харис се сеќаваат дека таа имала вистинска зависност од пијалокот и во недостатко на истиот ги пројавувала сите знаци на одвикнување.

Д-р Дејвид Крирор, кој дојде до овој заклучок прецизира дека компанијата Кока Кола нема вина за смртта на Харис, но ги повикува производителите на безалкохолни пијалаци да ги предупредуваат купувачите за потенцијалната опасност при прекумерна употреба на нивните производи. Неодговорниот однос е целосно на Харис и нејзиното семејство. Самиот факт дека дури две од децата на покојната се родиле без забна глеѓ, би требало да предизвика сериозна загриженост не само кај Наташа, туку и кај нејзините роднини. Но, тоа не се случило.