Една жена е уапсена затоа што ја оштетила познатата слика на Ежен Делакроа „Слободата го води народот“ во Ланс.

Жената, за која полицијата наведува дека има „име што звучи како француско“, ја оштетила познатата слика на Ежен Делакроа „Слободата го води нардоот“, која настанала во 1830 година во чест на народното востание.

Инцидентот се случил во музеј во Ланс, на север од Франција. Девојката, која има 28 години, со фломастер на дното од платното напишала AE911. Се се случило пред затварањето на музејот, а обезбедувањето брзо реагирало, ја фатило девојката и ја предало на полицијата.

Истражните органи велат дека девојката е во нестабилна состојба и дека е неопходно психијатриско вештачење.

Кустосите на музејот велат дека оштетувањето на сликата не е големо, но дека е неопходно со тоа да се позанимава реставратор.

Француските медиуми цитираат еден неименуван извор од полицијата дека нејзиниот натпис е јасна алузија на случувањата од 11 септември 2001 година кога терористи го нападнаа Њујорк и ги срушија кулите близначки на Светскиот трговски центар.

Една француска страница пренесува дека AE911 Truth е насловот на вебсајтот „Архитекти и инжењери за вистината за 9/11“ чии основачи себе се претставуваат како група која се обидува да ја воспостави позадината на нападот на зградите во Њујорк на 11 септември 2001 година.