Бразилскиот дебелко Момо вчера ги доби клучевите на Рио де Жанеиро од рацете на градоначалникот Едуарду Паеш и на тој начин симболично ја презеде власта во градот за пет дена на карневалот, кој така беше прогласен за официјално отворен...

"Во овој момент ја предавам власта на големиот крал Момо, за да може градот да се забавува за време на неговото владеење. Нека има мир и радост", изјави градоначалникот, паѓајќи смирено на колена пред 150-килограми тешкиот "монарх", придружуван од "кралицата" и двете принцези.

"Горд сум да го управувам со овој празник во петдневно лудило, празник кој е за сите. Го прогласувам карневалот во Рио за отворен", изјави како одговор на говорот на градоначалникот 33-годишниот Момо, чие вистинско име е Милтон Жуниор, банкарски службеник во "цивилниот" живот.

Мафтајќи со огромниот симболичен клуч на градот, покриен со бели и златни светки, кралот со грациозност и леснотија одигра самба и покрај својата тежина. Во танцот го придружуваа двете принцези и градоначалникот.