Британската влада планира да вгради одреден број шпионски направи на телекомуникациските мрежи со цел да надгледува како нејзините граѓани го користат интернет сервисот.

Меѓу надгледуваните интернет сервиси ќе бидат Facebook и Twitter, пренесува извештајот кој го објавил парламентарниот Комитет за безбедност и шпионажа на Велика Британија.

Целта на вградувањето на тие направи е да се надгледува активноста на речиси се што Британците работат на интернет, од разговори со семејството преку Skype програмата до посета на порнографски сајтови.

Британската влада наведува дека пристапот до комуникацииските податоци е исклучително важен за борбата против тероризмот и други видови криминал.

Властите велат дека првобитната цел е да можат да имат увид во податоците кој праќа пораки, кога и како ги праќа и кој ги прима истите.

Клучниот предизвик за владата е тоа што податоците ги добиваат од странски провајдери, компании од САД или од друго место, кои можеби не сакаат да бидат во обврска кон барањата на британските известувачки агенции.