Поради присилување на членките на сектата на проституција, во Мексико се уапсени 14 членови на секта.

Четиринаесет членови на сектата Бранители на Христос се уапсени во Мексико поради сомнеж дека своите припаднички ги приморувале на бесплатна работа и проституција, соопштија претставниците на мексиканската имиграциона служба.

Уапсените се сомничат и дека жените ги приморувале на сексуални односи со еден шпански државјанин кој тврдел дека е реинкарнација на Исус Христос.

Меѓу осомничените се шест Шпанци, по две личности од Бразил, Боливија и Венецуела, и по еден државјанин од Аргентина и Еквадор.

Федералната полиција и припадниците на имирационите служби оваа недела претресле куќа во близина на градот Нуево Ларедо, каде престојувале членовите на сектата, меѓу кои имало и деца и жени. Жените во главно се од мексиканско потекло и се верува дека тие се жртвите на сектата.

Иако на веб сајтот на сектата е наведено дека шеф на групата бил Шпанецот Игнацио Гонзалез де Ариба, истражувачите веруваат дека шефот е венецуелскиот државјанин Хосе Аренас Лосанхер Сеговија.

Гранки на сектата најверојатно се и понатаму активни во Перу и Аргентина.