Холандската кралица Беатрикс (74) синоќа изјави, во телевизиско обраќање кон нацијата, дека нејзиниот најстар син Вилјем-Александер (45) ќе стане крал на 30 април, по нејзиното заминување од престолот.

Вилјем-Александер така ќе биде првиот крал на оваа монархија по повеќе од еден век, колку што на престолот биле жени.

Кралицата кажа дека заминува од престолот не затоа што нејзината функција е премногу тешка, туку затоа што смета дека истата треба да им ја препушти на помладите, а нејзиниот син Вилјем-Александер е подготвен да стане крал на Холандија.

Кралицата со синоќешниот говор го означува крајот на нејзиното долго престојување на челото на монархијата, кое беше обележано со бурни промени во холандското општество и нејзина лична трагедија. Имено, нејзиниот среден син тешко е повреден на скијање во 2009 година, кога падна во кома од која се уште се нема разбудено.

Како што пренесуваат медиумите, нејзиното повлекување се очекувало, но сосема сигурно ќе ги погоди Холанѓаните кои ја обожаваат и најчесто ја викаат по прекар - Беа.

Принцот Вилјем-Александер е оженет со принцезата Максима Зоригета и има три деца.

Холандија е уставна монархија, во која значително е намалено мешањето на кралското семејство во политиката. Во минатото кралицата учествуваше во формирањето на владините коалиции, но тоа се промени во очи на последните избори во септември 2012 година.