Во Малезија во последните три недели загинале десет пигмејски слонови од Борнео, а активистите за заштита на животните веруваат дека се отруени.

Труповите се пронајдени во резерватот Гунунг Рара, а едно тримесечно слонче е спасено, кажаа денеска претставниците на источната провинција Сабах на островот Борнео.

Слоновите биле стари од четири до дваесет години. Се верува дека се отруени, но не е утврдено дали труењето било намерно. Лабораториските анализи на животинските остатоци се во тек.

Нема знаци дека животните биле мета на ловокрадците, иако во Сабах во последните години имало случаи на недозволен лов на слонови кои се ценат поради слоновата коска.

Според податоците на активистите, во светот постојат едвај 1.500 пигмејски слонови од Борнео. Поголемиот број живеат во малезијската провинција Сабах.

Пигмејските слонови, како и орангутаните, носорозите и други животни, се загрозени затоа што нивните живеалишта во прашумите исчезнуваат поради ширење на плантажите.