Последниот филм за тајниот агент 007, Skyfall, во кинеските кино-сали стигна пократок за неколку сцени и со изменет превод на разговорите на главните актери.

Кина е позната по цензурата на речиси се што доаѓа до запад, па така и Бонд се најде на удар на „заштитникот на националните и морални интереси на Кинезите“.

Поради непримерната содржина за тамошната власт, цели сцени нема да им бидат прикажани на Кинезите, а покрај тоа и преводот на одредени разговори е целосно изменет, па често и нема врска со зборовите кои се кажани на платното.

Една од избришаните сцени е снимена во Шангај во која Француски платен убиец убива кинески чувар додека се подготвува за атентат, како и целата приказна за мачењето на негативецот Раул Силва од страна на кинеските власти.

Студиото Sony Pictures одби да ја коментира цензурата што не ни чуди затоа што новиот Бонд е само уште еден филм во низата филмови кои се цензурирани само во Кина.