Британскиот суд денеска ги потврди анализите од претходната истрага дека Ејми Вајнхаус умрела од труење со алкохол.

Пејачката е пронајдена мртва во својот дом во Лондон во јули 2011 година. Имала само 27 години, а и со втората истрага е утврдено дека починала од труење со алкохол.

Судскиот иследник Ширли Редклиф вели дека се потврдени резултатите од првата истрага и дека пејачката починала од преголема количина на алкохол во крвта.

Британското правосудство новиот процес го започна затоа што главниот истражувач д-р Ендру Рид пред три години на позицијата на истражувачка ја поставил својата сопруга Сузан Гринавеј, за која неодамна е утврдено дека не е квалификувана за да биде на таа позиција.

Семејството Вајнхаус порано соопшти дека очекува исти резултати и дека до нова истрага не требало ни да дојде.