Во периодот од јануари до ноември 2012 година во Хрватска на обложување се потрошени 4,9 милијарди куни (околу 650 милиони евра), што е за околу 700 милиони куни (92 милиони евра) повеќе отколку во истиот период од 2011 година.
Приходите им пораснале на обложувалниците и автомат клубовите, во кои за 11 месеци се уплатени 783,1 милион куни (околу 103 милиони евра). Падот на приходот единствено го бележат казино клубовите, а и покрај кризата, оваа година хрватите ги срушија сите рекорди во обложување.
Од масовното обложување има корист и државната каса во која, како што се наведува, по основа на сумата која се уплаќа во спортските кладилници за 11 месеци се засилила за 246 милиони куни (32,5 милиони евра), што е за 32 милиони куни (4,2 милиони евра) повеќе отколку во истиот период лани.
Добивката оваа година додатно пораснала поради се пораширените онлајн обложувања, кои на обложувалниците им го намалува трошокот на изнајмување простор и плата за вработените.
