Поглаварот на Римокатоличката црква, Бенедикт XVI покажа вистински христијански дух за еден од најголемите христијански празници, и го помилува својот поранешен батлер Паоло Габриел, осуден на 18 месеци затвор поради оддавање на доверливи податоци од канцеларијата на папата.

„Светиот отец Бенедикт XVI го посети Паоло Габриел во затворот за да го потврди своето простување и лично да го информира дека го прифатил барањето за помилување на Габриел“, наведе Ватикан во соопштение.

Како што се наведува, помилувањето е „татковски чин“ според човекот со кој папата со години секојдневно бил во контакт.

Меѓутоа, поранешниот собар нема да може да ја извршува некогашната должност или да продолжи да живее во Ватикан.

Француската агенција потсетува дека Габриел во октомври оваа година беше прогласен за виновен за предавање на чувствителни документи на медиумите во акција на бунење против „злобата и корупцијата“ во Ватикан.

Ројтерс известува дека Габриел по посетата на папата е ослободен од ќелијата во Светата столица каде што беше на служење на казната и дека веќе му се вратил на своето семејство.

Папата Бенедикт XVI помилува и друг службеник на Ватикан, Клаудиј Скјарпелетиј кој е осуден за помагање и поттикнување на Габриел.