Благодарение на SMS порака пратена на погрешна личност, пожарникарите и полицијата во Лион успеале да го спасат животот на човекот кој се обидел да се убие.

Шефот на полицијата во Лион во 19:25 во недела добил паничен повик од една личност од областа на Париз. Таа личност кажала дека добила SMS порака која не била наменета за неа, во која „пријател јавува дека планира да се убие“.

Полицајците со помош на името на човекот кој ја напишал пораката го пронашле неговиот стан во Лион и се упатиле таму „што е можно побрзо“, пишува во соопштението кое денеска го издаде управата за јавна безбедност од таа област.

Бидејќи никој не одговарал, ги повикале пожарникарите кои провалиле во станот преку прозорецот, со помош на големи скали. Човекот лежел на подот, со две празни чаши алкохол покрај себе и „почнал да се сече по рацете“.

Пожарникарите и полицајците му пружиле прва помош, го однеле во најблиската болница и така му го спасиле животот.