Руската полиција денеска притворила вкупно 40 луѓе, вклучувајќи најмалку четири опозициони водачи, за време на одржување на забранет собир во Москва против претседателот Владимир Путин.

Како што е соопштено на сајтот на московската полиција, за време на протестот се притворени 40 луѓе.

Меѓу другото, приведени се левичарскиот водичи Сергеј Удалцов, Иља Јашин, Ксенија Собчак и блогерот Алексеј Наваљни.

Удалцов ја кренал тупаницата додека полицијата го водела кон возилото во близина на тргот Љубјанка во централниот дел на Москва каде што се собрале неколку стотина луѓе.

Јашин соопштил преку Twitter дека тој и Ксенија Собчак се приведени на иста локација.

Итар-Тас пренесол соопштение на московската полиција дека тие се приведени за време на собир кој властите не го одобриле и тоа поради директно учество во неговата организација.

И покрај предупредувањата на полицијата дека собирањето не е одобрено, околу 500 луѓе дошле на булеварот, од кои најмалку половина биле новинари и блогери.

Полицијата го растурила протестот и ги потиснала демонстрантите од булеварот Љубјанка кон блиската метро станица.

Целта на денешниот собир било да се обележат 12 месеци протест против Путин, меѓу кои имало и поголеми демонстрации.