Австралискиот ланец на кафулиња Gloria Jeans во Виетнам денеска бил принуден да се извини поради промотивната акција во која нудел бесплатен пијалок за жените со одредена висина.

Во почетокот на месецот, Gloria Jeans во рамки на промотивната кампања нудел бесплатен втор пијалок на жените високи најмалку 165 сантиметри, што според наводите на виетнамските медиуми бил одговор на владината кампања за зголемување на просечната висина на Виетнамците.

Компанијата е принудена да ја прекине промоцијата и да се извини откако противниците на оваа акција собрани на социјалната мрежа Facebook тврделе дека кампањата е навредлива за виетнамските жени.

„Оваа промоција не ги рефлектира нашите вредности, сите луѓе ширум светот се добредојдени во нашите кафулиња“, се наведува во соопштението на ланците Gloria Jeans.