Наставник по физичко образование тврди дека бил претепан од шестгодишно дете.

Џони Вебстер (27) висок е 180 сантиметри и тежок 100 килограми. Тој на американските меидуми им кажал дека бил претепан од Родриго Карпио, тежок „цели“ 22 килограми, инаку шестгодишен.

Малиот Родриго штотуку почнал да оди во прво одделение во едно јавно училиште во Њујорк, и учителите пријавлие дека е палав и дека умее да се закачува со другите. Меѓутоа, наставникот по физичко вели дека од Родриго добил сериозен ќотек.

New York Post пишува дека инцидентот избил кога Вебстер ги придружувал првоодделенците од училницата до кантината. Кога децата почнале да се буцкаат, наставникот скокнал меѓу нив и го фатил Родриго за рацете.

„Го стегнав за рачните зглобови, а тој се сврте и ме гризна. Запрепастен, го пуштив, а тој ме исшутира“, тврди поранешниот рагбист кој во „тепачката“ наводно се здобил со сериозни повреди на нозете.

Тој на судот бара отштета од родителите на Родриго, кој се запрепастени со тужбата.

„Апсолутно е невозможно нашиот син да направи такво нешто. Па, тој има само дваесетина килограми! Мислиме дека тврдењата на наставникот се лажни, и дека би требало да се засрами“, рече татко му на Родриго, Хорхе.