Австралискиот научник Сајмон Чепман предложил да се воведат дозволи за пушачи, кои би биле задолжителни при секое купување цигари. За нивното давање би се плаќал данок, а реиздавањето би зависело од почитувањето на ограничувањето за дозволен број на цигари.

Професор на Универзитетот во Сиднеј објавил студија во која предлага воведување на специјални дозволи за пушачи кои властите би ги одобрувале на година дена, а со тоа, смета тој, би се намалил бројот на пушачи, посебно меѓу малолетниците.

„Пушачите би морале при секое купување на цигари да покажат дозвола одобрена од надлежните институции, а продавачите не би смееле да им продаваат цигари на клиентите без дозвола“, објаснува австралискиот научник.

Пушачите, како што предлага Чепман, би морале да платат данок за издавање на годишна дозвола, а износот би зависел од годишното потрошување на секој поединец. Издавањето на нова дозвола би било условено со ограничување на секојдневната потрошувачка.

При купување на цигари, во дозволата би се бележел купениот број на цигари така што на поединецот со преминета граница на купени цигари не би му се издавала повеќе дозвола, а со самото тоа би му се оневозможило купувањето на тутун.

Во истиот весник во кој е објавена студијата, британскиот истражувач Џеф Колин се спротиставил на идејата на австралискиот колега окаректеризирувајќи ја како „авторитаристичка“ затоа што инсистира на последиците, наместо на влијанието, а главна вина за овој порок, истакнува тој, е тутунската индустрија, а не самите пушачи.