Децата кои ја прославувале Ноќта на вештерките во северна Англија добиле на подарок повеќе отколку што се надевале - кокаин, наместо вообичаените слатки.

Еден 23 годишник е уапсен и обвинет за поседување на дрога од A класа, откако родителите во пластичните кеси меѓу подароците кои децата традиционално ги добиваат кога одат од куќа до куќа - пронашле кокаин во среда навечер.

Кесите веднаш се однесени во полициската станица во Ројтон, која се наоѓа недалеку, северозападно од Манчестер.

„Во кесите имаше бел прашок кој полицијата го анализираше и потврди дека станува збор за кокаин. Кесичките на децата им се дадени во Мендип Клозоу, Ројтон“, соопштила полицијата.

„Родителите и полицијата брзо реагираа, во интерес на јавната безбедност. Заклучивме дека се работи за изолиран инцидент“, рече претставничката на полицијата Кетрин Хенкинсон.

На Ноќта на вештерките обичај е децата, маскирани, да чукаат по вратите на соседите со „закана“ - „слатки или пакост“ (trick-or-treat) и за тоа да добијат некоја слатка од соседите.

Овој пат, „слатката“ завршила во полиција.