Блазе им на Холанѓаните - не само што на сите страни имаат велосипедски патеки за побрзо и побезбедно да го користат велосипедот како превозно средство, туку на тие патеки никогаш повеќе нема да има мраз.

Во желбата да поттикнат колку што може повеќе луѓе да возат велосипед во текот на зимата, но и да го намалат бројот на повреди предизвикани од ледот, холандските истражувачи предложиле велосипедските патеки во иднина да се загреваат.

„Идејата е под патеките да се постави систем кој ќе спречи формирање на лед преку зимата“, вели инжинерот Марсел Берефијн.

Неколку холандски општини веќе изразиле интересирање за промена на системот кој би користел геотермална енергија на длабочина од 30 до 50 метри под земјата.

Трошоците за поставување на системот се проценуваат од 20.000 до 40.000 евра на километар на патеката, чија вкупна должина во целата Холандија оди над 35.000 километри.

Меѓутоа, Берефијн повеќе сака да зборува за практичната страна на проектот.

„Тоа ќе овозможи големи заштедувања. Ќе биде потребно помалку сол за топење на ледот, ќе се намалат медицинските трошоци за повреди, а луѓето помалку ќе ги користат своите автомобили затоа што повеќе ќе сакаат да се возат со велосипедите“, објасни тој, потсетувајќи дека секоја година се забележуваат околу 7.000 паѓања од велосипед.

Холандија има речиси 18 милиони велосипеди, на 16,5 милиони жители.