Постара Американка е уапсена затоа што ги отстранила постерите кои го прикажувале претседателот Барак Обама со бркови во стилот на Адолф Хитлер.

Осумдесет годишната Ненси Лек изјавила за телевизиската станица WVIT дека таквите постери ја навредиле.

Три постери со ликот на Обама се поставени минатата недела во близина на пошатата во градот Хеброн, Конектикат.

Работниците во служба на претседателскиот кандидат Линдон Ла Руш, кои ги закачиле постерите, повикале полиција откако Ненси Лек ги отстранила.

Лек рекла дека знаела дека ќе има непријатности поради тоа што го сторила, но бидејќи ја преживела Втората светска војна, како што навела, ја разлутило тоа што некој го прикажува претседателот како нацист.

Таа е обвинета за нарушување на редот и пуштена е откако ветила дека ќе се појави на суд наредната седмица.