Дејмон Тибодо, кој бил осуден на смрт поради силување и убиство на роднина во јужноамериканската држава Луизијана, ослободен е од затвор затоа што е прогласен за невин на основа на ДНК анализа.

Тој смртната казна ја чекал од 24 октомври 1997 година, поради силување и убиство на роднина (14), настан што се случил една година пред неговото осудување.

„Дејмон Тибодо (38) е пуштен од државниот затвор во Луизијана вчера попладне“, изјави Пам Лаборде, директор за комуникација на затворската служба во Луизијана.

Таа додала дека претходно не бил утврден датумот на погубување.

Тибодо бил осуден исклучиво на неговото признание, но анализата извршена на барање на обвинителот и адвокатот го оспорила тоа тврдење.

Овој е 18 осуденик на смрт кој на основа на ДНК е прогласен за невин во САД, соопштено е од информативниот центар за смртни казни.