Грчките власти соопштиле дека, играјќи си на едно градилиште, деца налетале на стотина рачни гранати останати од граѓанската војна.

Оружјето го пронашле ученици за време на изминатиот викенд откако по обилни врнежи е срушен патот кој се реконструира.

Воени претставници во градот Серес, 70 километри северно од Солун, соопштиле дека професионалци до денеска однеле и безбедно деактивирале повеќе од 400 гранати од советско производство.

Нејасно е колкав е бројот на пронајдените гранати.

Американската агенција потсетува дека силите на националистичката влада и некогашните партизани комунисти од антинацистичкиот отпор во Грција воделе граѓанска војна меѓу 1946 и 1949 година.