Спермата на еден дарител со опасна наследна болест во Данска е употребена за вештачко оплодување на 43 жени, а десетина деца ја наследиле болеста...

Данска ќе ги заостри прописите за работата на банките за сперма и клиниките за вештачко оплодување, откако една банка за сперма не реагирала како што треба кога е откриено дека еден од дарителите боледува од опасна наследна болест.

Банката за сперма Нордиск Криобанк добила информација дека еден од нивните дарители можеби боледува од Неурофибромитоза тип 1 (NF1), но после тоа со неговата сперма се оплодени уште две жени во Данска, при што едно од родените деца ја наследило таа болест.

Инаку, пред да се открие дека дарителот боледува од NF1, со неговата сперма биле оплодени околу 40 жени во Данска, Норвешка и Шведска, а од тој број само во Данска се родиле најмалку десетина деца со ова сериозно и непредвидливо заболување.

Поради тоа Данската управа за здравје добила налог да ја заостри контролата на процедурата во банките за сперма и клиниките за оплодување, а одлучено е дека од сега со спермата на еден дарител ќе можат да се оплодат најмногу 12 жени во Данска, наместо 25, како што било досега.

Банките за сперма и клиниките за оплодување исто така ќе бидат должни веднаш, без чекање за потврда на резултатот, да го стопираат користењето на сперма од дарители за кои ќе се јави и најмал сомнеж за наследна болест.