Саудиска Арабија ќе гради град во кој на сите работни места ќе работат жени...

Саудиска Арабија планира да изгради град само за жени со цел конечно да се направи компромис помеѓу строгите шеријатски закони и амбициозните жени кои сакаат да направат кариера.

Изградбата би требало да започне наредната година, а целиот проект се очекува да чини 84 милиони фунти и да отвори 5.000 нови работни места во текстилната, фармацевтската и прехранбената индустрија. Овој град би требало да им обезбеди на жените да добијат поактивна улога во развојот на државата.

Иако шеријатскиот закон во Саудиска Арабија не им забранува на жените да работат, официјалните податоци покажуваат дека само 15 проценти од женската популација побарале работа.

Неодамна кралот Абдулах најави дека жените ќе може да се кандидираат и да гласаат на локалните избори закажани за 2015 година.

Саудиска Арабија е единствена држава во светот во која на жените им е забрането да возат, а Меѓународниот олимписки комитет одвај ја убеди оваа држава да им дозволи на спортистките да настапат на Олимписките игри.