Американскиот неделник “Тајм” ја објави листата на 100 највлијателни луѓе во светот, на неа се најдоа спортисти, забавувачи, уметници, бизнисмени, политичари...

Оваа година на листата има рекордно мал број Американци, односно дури 54 лица се од странство.

Од “Тајм” велат дека настојуваат да изберат луѓе чие влијание истовремено е трајно и вредно за пофалба.

Така оваа година меѓу политичарите како највлијателни се прогласени колумбискиот претседател Хуан Мануел Сантос, италијанскиот премиер Марио Монти, германската канцеларка Ангела Меркел, американскиот претседател Барак Обама, американската државна секретарка Хилари Клинтон и многу други.

Меѓу спортистите се најдоа американскиот кошаркар со тајванско потекло Џереми Лин и аргентинскиот фудбалер Лионел Меси. Потоа актерките Клер Денс и Кристен Виг, пејачките Адел и Ријана, но и војвотката од Кембриџ, Кејт Мидлтон и нејзината сестра Пипа.

Свое место на листата најдоа хакерската група "Анонимус" и данскиот готвач Рене Реџепи, кој е македонски Албанец.

На листата за 2012 година се најдоа 38 жени, што е повеќе од било кога досега.