Министерството за внатрешни работи во Австрија ќе ангажира така наречени Интернет ловци во австриските училишта во рамки на борбата против интернет криминалот.

Се работи за нова иницијатива на Министерството која предвидува професионални службеници ангажирани во училиштата за да ја надгледуваат содржината која ја користат учениците.

Податоците покжауваат дека 98% од младите, на возраст меѓу девет и 16 години, во Австрија користат интернет дома. На социјалните мрежи, како Фејсбук, сопствен профил имаат 62% од нив.

„Децата често проследуваат бројни податоци и информации и со тоа се изложуваат на големи опасности, па се и лесен плен за онлајн малтертирање и мобинг“, предупреди министерката за внатрешни работи на Австрија, Јохана Микл-Лајтнер.

„Интернет ловците“ кои ќе доаѓаат во училиштата во иднина треба да се погрижат за сигурно сурфање по интернет.

По углед на пилот проектот во покраината на Горна Австрија, 300 специјални контролори ширум Австрија ќе бидат ангажирани во училиштата.

„Интернетот нуди многу можности, но настануваат се повеќе закани и новите деликти не смеат да бидат занемарени“, е објаснување од австриската влада.

Проблемите опфаќаат од видео снимки на кои доминира насилство и кои се шират преку интернет, до лажирани фотографии или коментари на форуми за да се навредуваат други, упатства за правење бомби, како и детска порнографија.

Полицијата ги известува учениците со кратки филмови за законски информации, па на тој начин им ги објаснува и правилностите и неправилностите при користење на интернетот.

„И кога нападите се случуваат виртуелно, имаат многу реални последици. Целосно е неприфатливо криминалците преку интернетот да се вовлекуваат дури и во детските соби“, нагласи Микл-Лајтнер.