Енвисат, најважниот европски сателит за набљудување на Земјата престанал да праќа податоци за контрола на мисијата.

Инжењерите моментално вложуваат големи напори за да го спасат, а претставниците наведуваат дека радарските снимки покажале дека објектот со тежина од осум тони не е физички оштетен, но дека од него повеќе не добиваат податоци.

Енвисат е лансиран во 2002 година, како најголема невојна вселенска опсерваторија за набљудување на копното, океанот и ледените покривачи на половите на Земјата и атмосферата.

Сателитот, чие користење до сега чинеше околу 2,5 милијарди евра, веќе го надмина планираниот работен век за пет години, но европската агенција за истражување на вселената ESA се надеваше дека тој ќе остане употреблив до 2014 година.

Контролната мисија соопшти дека професионалците се обидуваат да го обноват контактот со сателитот, но признаваат дека во овој момент не можат многу да сторат.

За сега нема потврда дека сателитот автоматски влегол во безбеден начин на работа и ги свртел своите панели за собирање на соларна енергија кон Сонцето за да осигури напојување на најважните системи.

Доколку тоа не се случило, постои опасност дека батериите на Енвисат наскоро ќе се испразнат и дека сателитот нема повеќе да може да се опорави.