Случајот на тримесечното девојче кое таткото го претепало на смрт затоа што сакал син, повторно укажа на тешката положба на милиони „несакани девојчиња“ во Индија.

Неха Африн умрела од застој на срце во државната болница во индијскиот град Бангалор откако три дена се борила за живот.

Таа е доведена во болница со повреди на главата и трагови од претепување и гребнатинки по целото тело, што предизвикало општонационален бес кој доведе до апсење на нејзиниот татко пред два дена.

Случајот Африн е најнов во низата слични ширум Индија каде бебињата-девојчиња често се оставувани, мачени, па дури и убивани и повторно го отвара прашањето зошто раѓањето на ќерки во Индија не е пожелно.

Омажените жени во патријархална Индија се соочуваат со огромниот притисок да раѓаат синови кои се гледаат како хранители на семејствата и негуватели на постарите родители, додека на ќерките често се гледа како на „терет“ во традиционалните семејства затоа што е потребен голем мираз за да се омажат.

Сите индијски влади го креваат тоа прашање за да се промени социјалната слика за раѓањето на девојчиња, но десега имале мало влијание на промена на врежаното мислење за женските деца.

Претпочитањето на машки деца доведе до огромни и алармантрни диспропорции во раѓањето на момчиња и девојчиња судејќи според податоците од пописот во 2011 година според кој има 914 девојчиња наспроти 1000 момчиња во Индија, што е многу помалку во однос на просечниот светски однос на новородени женски спрема машки деца (951 спрема 1000).