Јапонските весници пишуваат дека Sony по четири години „во црвено“ ќе го намали бројот на работници за 6%, што значи дека ширум светот 10.000 работници ќе останат без работа.
Многу јапонски фирми, од произведувачи на мобилни, па до електронски компании, се најдоа во проблеми поради силниот јен и конкуренцијата, како што се американскиот Apple и јужнокорејскиот Samsung.
Произведувачите на телевизори посебно се најдоа на удар, па се проценува дека Sony, Panasonic и Sharp заедно ќе забележат губење од 17 милијарди долари во фискалната година која штотуку заврши. Инвеститорите будно ќе ја следат утрешната конференција за новинарите на новиот извршен директор на Sony, Казуо Хираи, кој фирмата ја презеде минатиот месец.
„Под новиот извршен директор полесно е да се пресечат работните места или да се тргне во нова насока“, рече фонд-менаџерот од Фукоку Капитал, Јуки Сакураи и додаде дека би сакал Sony повеќе да се префрли на други производи освен телевизори. „Ако се држат до телевизорите, можеби ќе водат војна во која нема да можат да победат“, рече Сакураи.
Кон крајот на март Sony имаше малку повеќе од 168.000 вработени. Со отпуштање на работниците, можно е од седумте директори, кои работеле до крајот на март, да се бара враќање на бонусот.
